2024 年度嘉許年度捐血者安排

【嘉許年度捐血者活動安排】

又嚟到一年一度 #614世界捐血者日，中心想藉呢個日子，好好感謝一班熱血嘅恆常捐血者。有你哋過去一年嘅支持，血庫得以維持穩定同安全嘅供應。除咗為各位捐血次數達25次或25倍數嘅捐血者派發獎項外，中心仲準備咗一系列「打卡」活動呀！

＊＊＊＊＊＊＊＊＊＊

先講領獎安排！

由2024年6月8日起，本年度（2023年4月1日至2024年3月31日）捐血次數達25、50、75、100次嘅捐血者，可以帶同換領信到各區捐血站領取捐血紀念章；

至於喺本年度捐血次數達125次或以上嘅得獎者，則可以帶同換領信到西九龍捐血站換領捐血紀念座。

再講周年捐血頒獎典禮直播

雖然，今年有舉辦周年捐血頒獎典禮，但由於場地有限，未能邀請全部獲嘉許捐血者。中心特別安排典禮直播，歡迎大家喺今個星期六（6月8日）朝早11點緊貼中心Facebook專頁「Blood for Life 熱血使命」，一齊喺線上同步出席典禮。

＊＊＊＊＊＊＊＊＊＊

話埋畀您知，手機應用程式 HKBlood 都會換上新背景，用APP 預約捐血嘅時候記得留意下啊！

另外，本年度得獎嘅捐血者、企業同團體嘅名單，都會刊登喺喺6月14日出版嘅《頭條日報》內，藉此表揚各位堅持恆常捐血嘅習慣！到時記得拎返份做紀念喇！

＊＊＊＊＊＊＊＊＊＊

講到明要全城同樂，當然唔可以錯過設置咗喺全港多區嘅「打卡」熱點喇。

6月起部分地區小巴車身、巴士椅背、指定嘅港鐵站廣告版同伊利沙伯醫院戶外廣告牌，已經換上特色設計；多區捐血站亦設置特色佈景板，捐完血再打卡無難度。

小巴車身廣告（6月5日至9月4日）

巴士椅背廣告（6月7日至6月20日）

港鐵站廣告版（6月8日至7月5日）

港鐵銅鑼灣、灣仔、中環、觀塘、旺角、油麻地、奧運、荃灣、沙田站、輕鐵大棠路站

＊＊＊＊＊＊＊＊＊＊

再次衷心感謝所有捐血者願意同中心風雨同路，喺過去嘅疫情下堅持默默付出，用熱血拯救生命，為無數傷病者送上生命之禮。期盼大家喺未來日子繼續同我哋攜手，延續熱血使命！