2026 嘉許年度捐血者活動安排

一滴熱血，捐血救人，彰顯人道使命！

六月世界捐血者月除咗派發獎項，表揚本年度捐血次數達25或其倍數嘅捐血者外，中心今年同樣準備咗多項活動，答謝所有恆常捐血者過去一年對血庫穩定供應嘅付出！各項活動嘅安排，繼續睇埋落去啦～

＊＊＊＊＊＊＊＊＊＊

【宣傳車出動！】

中心已派出宣傳車，喺6月1日至28日期間到訪各區同大家見面，並展示各位熱血英雄嘅名字，感謝各位熱血英雄嘅默默付出！讓全港市民都可以見到大家無私嘅温暖同付出！大家記得過嚟揾吓自己或者朋友個名，影張打個卡喇～

＊＊＊＊＊＊＊＊＊＊

【打卡活動】

全港多個捐血站，包括荃灣、西九龍、元朗、沙田、中區、銅鑼灣、觀塘、旺角捐血站設有互動佈景板。等你捐完血之後影靚相！

記得寫埋血滴型心意咭，放落捐血隊長嘅血包入面，為病人打打氣

＊＊＊＊＊＊＊＊＊＊

【領獎安排】

由2026年6月14日起，凡於本年度（2025年4月1日至2026年3月31日期間），捐血次數達到25、50、75、100、125、150、175次嘅捐血者，可以帶同換領信到各區捐血站領取捐血紀念章；而喺本年度捐血次數達到200次或以上嘅得獎者，則可以帶同換領信到西九龍捐血站換領捐血紀念座。

＊＊＊＊＊＊＊＊＊＊

【特別捐血活動】

為慶祝本年度世界捐血者日，中心特別準備咗期間限定嘅紀念品送畀各位成功捐血者～

今次嘅期間限定紀念品係「捐血隊長Captain BLOOD盲盒」，四款公仔造型隨機派發，快啲約埋朋友一齊捐血，睇吓抽到邊款公仔喇！

想知點領取新嘅盲盒公仔即睇下面：

捐血者有禮—「捐血隊長Captain BLOOD盲盒」

喺6月14日至21日期間，到捐血站或捐血車成功捐血，可獲贈 「捐血隊長Captain BLOOD盲盒公仔」一隻（款式隨機）。 數量有限，送完即止。

再次衷心感謝所有捐血者願意同中心風雨同路，喺任何時候都願意挺身而出，攜手挽救生命。期待未來日子繼續同大家一齊，向病人傳遞希望，延續熱血使命！